Этноауыл
2025 жылдың 2 маусымы күні «№2 Новоишим орта мектебі» КММ аумағында «Қазақстан балалары» бағдарламасы аясында ұйымдастырылған этноауылдың ашылу салтанаты өтті. Мерекелік іс-шараға №2 Новоишим, Привольная және Червонная мектептерінің ұжымдары қатысты.
Этноауыл–қазақ халқының салт-дәстүрі мен әдет-ғұрпы қайта жаңғырған шынайы мәдени кеңістікке айналды. Қонақтарды ұлттық әуендер, мерекелік билер және жүргізушілердің ақжарма тілектері қарсы алып, даланың кеңдігі мен қонақжайлығы сезілді.
Этноауылдың ашылуымен жиналғандарды аудан әкімінің орынбасары Сапанов Берік Айсинович құттықтап, ұлттық құндылықтар мен мәдени мұраны сақтау, жас ұрпақты тәрбиелеудегі маңызын атап өтті.
Сахна төрінде домбырашылар күмбірлеген күй орындап, көрерменнің жүрегін тебіренткен «Бесікке салу», «Сырға салу», «Қазан майлау» сынды ұлттық салт-жоралғылар көрсетілді. Бұл көріністер–тарих пен мәдениеттің өміршең сабағы, ұрпақтар арасындағы алтын көпір іспетті болды.
Шараны ерекше сәнге бөлеген– оқушылардың орындауындағы ұлттық әндер мен билер. Жанды «Қара жорға» биінен бастап, Отанға деген сүйіспеншілікке толы жүрек тебірентер вокалдық нөмірлер көрермендер көңілінен орын тапты.
Бұл күн–рух пен бірліктің, ата-баба аманатына деген құрметтің мерекесіне айналды. Этноауыл тек ұмытылмас әсер сыйлап қана қоймай, халқымыздың жарқын болашағы дәстүрді сақтап, ұрпаққа жеткізуде екенін тағы бір мәрте еске салды.
